fleiri börn

já, ég var að bæta einni barnasíðu við, sá stutti er alveg glænýr eða tæplega 2ja vikna í dag og hann á stóra systur sem heitir María Nína og er alveg að verða fjögurra ára. Kíkið endilega á þau!

bleh búið!

núna virkar þetta fínt, þeas. að 'publisha' en hins vegar er soldið erfitt að komast inná síðuna sjálfa og engar athugasemdir.
Maður getur víst ekki fengið allt...

bleh!

þetta virkar ekki! :(

hringleikahús lífsins

Ég áttaði mig á því í gær að það er ekki bara tískan sem fer í hringi heldur lífið líka.

Ég sat í fyrsta tímanum í þýðingafræði í gær og þá áttaði ég mig á því að fyrir X mörgum árum í kóngsins Köbenhavn sat ég einmitt á skólabekk og hugðist leggja stund á 'ervhvervssprog' í Copenhagen Business School með það að markmiði að verða túlkur. En einhvern veginn var ég ekki alveg nógu sátt við skólann; alltíeinu komin inn í bekkjarkerfi eftir 5 ár í áfangakerfi; eða lífið í Köben og var skyndilega komin með heimþrá og dreif mig heim.
Til að læra íslensku í HÍ en það var nákvæmlega það sem ég hafði 'flúið' frá 3 árum áður. Og núna er íslenskunni svona um það bil lokið og ég búin að loka öðrum hring með því að skella mér í þýðingafræði.

Já, lífið getur svo sannarlega verið dálítið írónískt á stundum.

yoga

Eitt það fyrsta sem ég gerði þegar ég kom í bæinn var að skrá mig á yoga-námskeið og fyrsti tíminn var í gær. Þetta leggst voðalega vel í mig og ég hlakka til að halda áfram og ég veit að þetta leggst líka voðavel í D því honum finnst að ég þurfi að læra að slaka aðeins á. Ég hélt reyndar að hann væri einn um þá skoðun en annað kom í ljós áðan.

Ég fór í heimsókn til vinkonu minnar og sagði henni að ég væri byrjuð í yoga og hún svaraði með einu orði en mikilli áherslu: "Gott!"

Ég gat ekki annað en brosað.

helgin

jæja, þessi helgi hefur eiginlega farið fyrir lítið og ég sem ætlaði að vera svo dugleg en planið mitt rústaðist einhvern veginn allt af því að D var veikur í gær og mætti ekki í vinnuna og ég var að mestu leyti bara heima að kúra með honum og svoleiðis. Og svo voru líka smá björgunaraðgerðir í gangi fyrir amrísku stelpuna sem kom með mér í bæinn á þriðjudaginn var. Henni tókst nefnilega að velta bíl sem bróðir hennar (læknir á vellinum) var með í láni og út af því talar mágkona hennar ekki við hana eins og er... án þess að spá í það að hún má vera þakklát fyrir að Suzy greyið hafi ekki slasað sig í veltunni.
Enívei, ég sótti Suzy til KEF í gær og við kíktum aðeins í bæinn, það var voða voða gaman og við komum ekki heim fyrr en um 4 þannig að það var ekki farið á fætur fyrr en um hádegisbil í dag.
Svo þegar ég ætlaði að fara að gera eitthvað af viti í dag eins og að klára að pakka og/eða að vinna í einhverjum atvinnuumsóknum þá hringdi mamma og sagði mér að 9 ára frænka mín hefði viðbeinsbrotnað þannig að auðvitað fór ég í sjúkraheimsókn til hennar og hún var nú barasta vel spræk með höndina í fatla. Snillinn ég fór með litabók og liti til hennar en auðvitað brotnaði viðbeinið hægra megin þannig að hún getur lítið skrifað og litað eins og er en það kemur.

HOBBITAHOLAN ER LAUS!!!

Já, mín er flutt og hobbitaholan er laus til leigu ef einhver hefur áhuga. Krúttleg risíbúð í 105, með baðkari, nýrri þvottavél í kjallara, útsýni yfir Perluna og Hallgrímskirkju.
35þ á mánuði.

Hefur einhver áhuga?

gyðjan mætt í bæinn...

með nett kúltúrsjokk. Hér er alltof mikið af bílum, húsum, trjám, fólki, hávaða og stressi. En ég hlýt að lifa það af.

Sumarið var dásamlegt og maður upplifði ýmislegt, sumt færslufært, annað ekki. Sjáum til hvort ég laumi inn einhverjum góðum sögum seinna meir.

Jæja, best að fara af stað að flytja, skrifa lokaritgerð, finna vinnu, byrja í skólanum og... og... og...

tónleikarnir...

voru barasta alveg ágætir. Ég var búin að sjá það sem mig langaði að sjá fyrir hlé en þá voru bæði RíóTríó og KK búnir að spila. Svo var smá hlé og KK hinn amríski steig á stokk eftir það.

Ríó-arnir voru frábærir en KK var STÓRKOSTLEGUR! Ég hef aldrei séð manninn á sviði áður en núna er ég harðákveðin í því að sjá hann á sviði aftur. Hann er alveg frábær. KK hinn amríski var ekki alveg eins góður, kannski heldur ekki alveg að marka mig þar sem ég get ekki sagt að ég sé stór aðdáandi hans og þekki lítið af lögunum hans. En öll lögin hans hljómuðu nánast eins, bara mismunandi textar og það fyndnasta var að hann kann ekki alveg að enda lögin sín. Hann byrjar á lagi og spilar og syngur og syngur og í lokin slær hann nokkrum sinnum á strengina og þegar hann nennir því ekki lengur þá segir hann "Thank you" og þá veit maður að lagið er búið og allir klappa.

Ég held að ég vilji frekar sjá Krissarann í bíó en á tónleikum. Sem sagt mjög góð kvöldstund!

stefnumót á bakvið Laugardalshöll...

jamm, mamma mín var að hringja og spyrja mig hvort ég gæti átt stefnumót við mann aftan við Laugardalshöllina fyrir hana klukkan 3. Frekar skrítin beiðni en það sem ég fæ úr krafsinu er að kyssa gamlan nágranna á kinnina og 2 miða á tónleikana með Ríó Tríó, KK og KK hinum amríska í kvöld. Kvarta ekki yfir því.

Annars er frekar mikið að gera hjá mér þessa dagana; passa 2 íbúðir og 1 kött, ganga frá eftir LON-ferðina og pakka fyrir sveitasæluna, vera eins dugleg og ég get að skrifa/undirbúa BA-ritgerðina mína, ganga frá bankamálum og slíku fyrir næstu 2 mánuðina og reyna að slaka aðeins á inná milli, bara svona til að ná áttum.

Mestur tíminn fer samt að hugsa um D... ;o)

bloggfall

bara að vara við yfirvofandi bloggfalli... ég fer til LON á lau og á fjöll eftir 2 vikur þannig að yfirvofandi er svakalegt bloggfall og ég lofa engu um nýjar færslur fyrr en í september!

GÓÐA SKEMMTUN Í SUMAR!!! hvarsemþiðeruð

zombie og hárið mitt frá Sýrlandi.

já, maður er búinn að vera eins og hálfgerður zombie um helgina, var nefnilega að vinna næturvaktir og ég sef alltaf illa á daginn. Og vakna frekar súr. Sum sé ekki mikið stuð á mínum bæ þessa helgina... Og auðvitað var mér boðið í heljarinnar ammli á fös, bauðst svört vinna á lau, litla uppáhaldsfrænkan vildi fá frænkukvöld og svo held ég að það hafi líka verið útilega í boði en er ekki viss. En sem sagt, mín bara að vinna kl. 22-10.

Tja, reyndar var tekinn smá rúntur suðrí Reykjanesbæ á sunnudaginn eftir vinnu til að koma Karine og Stefan (CAN) á gistiheimili þar (sem reyndar skyndilega breyttist í **** hótel með Iðnó-glerskálanum...) Þetta sem átti að vera stutt skutl til Keflavíkur breytist í "hvar er hægt að gista?-leik" með tilheyrandi rúnti um flest hverfi Keflavíkur. Það var þ.a.l. þreytt par (D líka að vinna næturvaktir) sem kom heim í hosiló um eittleytið á sunnudaginn og heyrði þá að einhver nágranninn var að æfa sig á klarinett... En sem betur fer er það ómþýtt hljóðfæri og það heyrðist ekki svo mikið á milli þegar maður var kominn inn í hobbitaholuna.

Í gær komst ég svo að því að ég var kominn með nýjan nágranna, hann sem spilar á klarinettið, og hann er frá Sýrlandi og heitir Mæher eða eitthvað svoleiðis. Við áttum stutt samtal á ganginum í gær og hann kynnti sig. Eftir nokkuð spjall sagði hann:
"Did you get my name?"

Ég: "No."

Hann um leið og hann togaði í hárið á sér: "It's like 'my hair' in English."

óraunhæft!

jamm, væntingar um einkunn uppá 9,5-10,5 reyndust vera óraunhæfar eins og ég hélt. Ég fékk nákvæmlega það sem ég bjóst við eða 7,0 - maður getur víst lítið kvartað yfir því.

annars var ég að koma úr vinnunni og er bara dauðþreytt! Ætla heim í bað og svo beint uppí rúm, zzz...

Kæri herra Guð, þetta er hún Anna

Ég var að klára að lesa bók sem ég les alltaf reglulega og hef gert það síðan ég las hana fyrst þegar ég var átta eða níu ára. Ég er örugglega búin að lesa hana tíu sinnum! Þetta er bókin Kæri herra Guð, þetta er hún Anna. Bókin verður bara betri við hvern lestur og ég fæ einhvern veginn aldrei nóg af henni. Ég hlæ alltaf á sömu stöðum og græt alltaf á sömu stöðum og mér finnst ég einhvern veginn verða pínulítið betri manneskja eftir að hafa lesið bókina. Ef það væru bara fleiri eins og hún Anna.

Annars hef ég verið að díla aðeins við Útlendingastofnun undanfarið, fyrir hann David og ég er ekki frá því að mér finnst eins og gæði þjónustunnar fari eftir því hvaðan fólk er. Auðvitað á það ekki að vera svoleiðis, þetta á að vera fordómalaus stofnun en ég hef þetta bara svo sterklega á tilfinningunni...

einkunnir

Jæja, þá er maður aftur farinn að stunda Hlöðuna en það er hálfskrítið því það er svo fámennt og opnunartíminn svo stuttur. Það er víst að koma sumar. En vegna of mikillar vinnu í vor þá er maður búinn að fresta skilum á lokaritgerðinni til hausts þannig að maður verður víst að vera duglegur þangað til maður fer á fjöll.

Annars er ég búin að fá eina einkunn, úr seinna prófinu sem mér gekk verr í en í fyrra prófinu en einkunnin sem ég fékk var alls ekki slæm: 8,5. Og ég sem var búin að telja sjálfa mig á að skella mér í sumarpróf til að laga einkunnina. Held að það gerist ekki þörf á því úr þessu.

Það er spurning hvort ég geti þá líka bætt 2,5 við einkunnina sem ég ímynda mér að ég fái úr fyrra prófinu mínu. Það myndi þýða 9,5-10,5 en ætli það sé ekki nokkuð óraunhæft. Kemur í ljós.

Best að fara að snúa sér að Ólafi karlinum.

loksins, LoKsInS, LOKSINS!

Var tími fyrir mig og David að gera eitthvað saman eina kvöldstund og LOKSINS gátum við fagnað saman próflokum og afmælinu mínu í algjörri afslöppun. Sem við gerðum síðasta miðvikudagskvöld.

Það var hreint út sagt dásamlegt. Ég sótti hann í vinnuna klukkan fimm og þá fórum við heim til hans og slökuðum aðeins á, náðum vinnuþreytunni úr okkur og græjuðum okkur fyrir kvöldið því nú var sko komið að því sem ég hafði ákveðið að gefa sjálfri mér í ammlisgjöf. Að fara út að borða.

Við fórum á Hereford og fengum góðan mat, gott vín og gott whiskey á eftir.

Þetta var svo frábært kvöld að ég svíf ennþá um á rósrauðu skýi...

ein soldið eftirá...

Ég er svona soldið eftirá þessa dagana, með bloggið það er að segja. Kannski af því að maður er háður opnunartímum ákveðinna stofnanna... C’est la vie.

Mig langaði aðeins að blogga um lau-kvöldið. Ég ‘slapp’ við öll júrópúró-partý þar sem ég var að þjóna til borðs á kvöldfagnaði kóramóts eldri borgara. Mjög spennandi það. Nema hvað, að þegar vinnunni lauk rétt fyrir tvö þá vorum við þrjár skvísur í stuði, tja eða allavega hálfstuði og ákváðum að hittast heima hjá mér eftir fataskipti og koma okkur í bæinn. Þannig að þegar klukkan var að verða þrjú vorum við loksins tilbúnar og drifum okkur af stað. Ég hef aldrei byrjað að djamma jafnseint og ég vil taka það fram að það var farið að birta aftur þegar við fórum á kreik.

Það var ekki nokkur séns að ná í bíl á þessum tíma þannig að við stukkum bara á næsta bíl sem stöðvaði á rauðu ljósi við Lönguhlíðina og fengum far með elskulegri stúlkukind í bæinn. Takk fyrir það, rauði Yaris.

Þegar við komum hingað biðu stelpur eftir okkur í röðinni með töfra sms-skilaboð sem komu okkur inn á nótæm. Svona virkar þetta víst í dag. Ég er þokkalega glötuð í djamminu og þekki ekkert inn á svona fídusa og því síður rétta fólkið...

Innandyra drukkum við smá bjór, dönsuðum, töluðum við alls konar fólk og svo labbaði ég heim uppúr fimm. Og meira að segja þá var einhver njólinn að reyna að pikka mig upp. “Má ekki bjóða þér inn í kaffi? ...eða rauðvín?” Well, I don’t think so.

Þetta seina djamm mitt var barasta alveg ágætt og gaman að fara út með einhverjum sem maður þekkir ekki vel og sjá nýtt fólk!

hver er þessi ELÍSABET BREKKAN eiginlega?

Eins og hverri góðri konu á fertugsaldri sæmir þá horfði ég andaktug á beina útsendingu RÚV frá konunglega brúðkaupinu í Köben á föstudag. Skálaði meira að segja í dönskum bjór og borðaði amrískt 'smörrebröd' með!

Þetta var alveg ægilega hyggeligt hjá mér og ekkert sem sló á gleði mína nema þessi Elísabet Brekkan sem var að lýsa viðburðunum með honum Boga Ágústssyni. Hún vissi ekki neitt í sinn haus og greip endalaust framí fyrir Boga og var alltaf að biðja hann að rétta sér kaffið og kökuna og blablabla. Þetta er ekki einu sinni það versta! Það kannast örugglega allir við það að hafa talað við fólk í síma sem andar beint í tólið þannig að allt samtalið verður litað af svona hálfgerðu "ffffffhhhh"-hljóði. Well, kerlingardruslan gerði það í beinni útsendingu í sjónvarpinu. Mjög sjarmerandi, eða hittó!

Svo fannst henni prinsinn svo viðkvæmur af því að hann táraðist þegar hann sá prinsessuna sína ganga inn kirkjuna. Já, eða að hann væri með ofnæmi fyrir blómunum á staðnum. Hún var alveg greinilega ekki að sinna sínu hlutverki þarna sem þulur með Boga því hann var að reyna að beina henni inn á réttar brautir þegar hann byrjaði sjálfur að tala um fínu kjólana sem konurnar voru í...

Já og mér finnst hún bara alls ekki eiga það skilið að bera nafnið Elísabet. Og hananú!

fjölmiðlafrumvarpið

fyrir þá sem vilja skoða málið nánar er þetta kjörinn vettvangur til þess!

THANK GOD IT'S FRIDAY!

Í dag fer David í síðasta prófið sitt og það væri þá kjörið tækifæri fyrir okkur að fagna því saman í kvöld en ónei. Hann þarf að fara beint heim að sofa til að vera klár fyrir næturvaktina í nótt!

Gamla rútínan er byrjuð aftur, þeas. fríhelgi hjá mér og næturvaktir hjá honum. Næsta helgi er svo fríhelgi hjá honum en vinnuhelgi hjá mér. Það er svo gaman að vera að vinna vaktavinnu og eiga alltaf frí á sitt hvorum tímanum eða þannig! Frekar pirrandi. Ég er búin að lofa sjálfri mér því að þetta verður ekki svona næsta vetur.

Í dag er eiginlega fyrsti frídagurinn minn síðan einhvern tímann fyrir langalöngu. Ég tel ‘sumarfríið’ mitt í byrjun maí ekki með því það var tekið til próflesturs. Mig langar að gera eitthvað skemmtilegt í dag og í kvöld but I don’t have any ideas... En allir aðrir eru innstilltir á það að gera eitthvað skemmtilegt á morgun (Júróvisíón-fyllerí með Jónsa) en þá er mín að vinna. Story of my life.

Jæja, ég er farin til að njóta dagsins. Góða helgi!

læknadóp

Þar sem ég hef verið undarlega meðvituð um vinstra hné mitt undanfarnar vikur/mánuði þá ákvað ég að drífa mig til læknis, bara til þess að fá það staðfest að ég væri ekki búin að eyðileggja neitt. Verð nebblega alltaf soldið paranojd ef ég finn að líkami minn fúnkerar eitthvað öðruvísi en vanalega því ég er ekki með nein ofnæmi, óþol, ónýta liði, gömul beinbrot eða þess háttar sem getur angrað mig.

Ég verð eiginlega að byrja alveg á byrjuninni sem var þegar ég hringdi og pantaði tíma á heilsugæslunni, á mánudagsmorguninn ca kl. 9.

É: Góðan dag, mig vantar tíma hjá heimilislækni.

H: Hver er læknirinn þinn?

É: Ég er nýflutt í hverfið þannig að ég er ekki á skrá hjá neinum.

H: Jájá, það er laust hjá Á. Viltu koma kl. 10:40?

É: (frekar hissa á 'snöggheitunum') Öhh, ég kemst ekki í dag. Væri möguleiki að koma á morgun, fyrir hádegi?

H: Já, það er laust frá 8:40 til 11:20, allir tímar.

Ég hef aldrei fengið tíma hjá heilsugæslulækni með jafnskömmum fyrirvara! Ég hugsaði með mér að læknirinn hlyti að vera nýbyrjaður en María vinkona mín sagði að hann gæti líka verið algjör trunta þannig að enginn vildi vera hjá honum. Ég mætti allavega spennt á heilsugæsluna daginn eftir og fékk þá að vita það að læknirinn væri veikur en mér var troðið inn á annan lækni strax.

Ég talaði við hann og sagði honum að ég væri ekki með neina verki nema ég væri í beinu átaki á hnéð, þ.e.a.s. þegar ég væri að lyfta, en annars væri ég alltaf meðvituð um hnéð. Vissi einhvern veginn alltaf af því en það háði mér samt sem áður á engan hátt. Sem sagt ENGIR VERKIR.

Eftir að hafa togað mig og teygt þá sagði hann mér að sleppa fótaæfingunum um tíma, hjóla frekar en að hlaupa, kaupa mér hitahlíf á hnéð og almennt bara að fara varlega. Já, og hann mælti með sundi.
Og svo í lokin eftir ENGIR VERKIR-útlistingu mína þá sagði hann mér að taka bólgueyðandi ef þetta angraði mig eitthvað og skrifaði svo uppá lyfseðil fyrir mig fyrir einhver súperdúper bólgueyðandi lyf! Hann hálfpartinn þröngvaði þessu uppá mig og sagði mér svo að ég réði hvort ég leysti þetta út eða ekki.

Ég var bara svo hissa. Engir verkir en samt lyfseðill uppá bólgueyðandi og verkjastillandi.

Svona fær maður læknadóp.

uppfærsla

jæja, ég var aðeins að fikta í listunum mínum hér til hægri. Bæta inn nýrri bók og á eftir að bæta annarri við. Ég fór á Borgarbóksafnið um daginn til að fá mér einhverja afþreyingu að lesa til að losa hausinn augnablik frá lærdómnum fyrir svefninn í próflestrinum og ég valdi þessa bók. Hálfírónískt val þar sem ég ætlaði að leiða hugann frá íslenskupælingum með þessum lestri... Bókin er góð og ég gat kúplað mig útúr pælingum um íslenskt mál að fornu.

Reyndar var hugmyndin að blogga aðeins um afmælisdaginn minn en ég hef ekki tíma - á að vera mætt í vinnu eftir 15 mín. FARIN!

BÚ- HÚ- HÚÚÚÚIN!!!!!!!!!!

í prófunum!!! jibbíjeij, jibbíjibbíjibbíjeij!!!!!

vildi bara deila þessu með ykkur.


Ennfremur er það óumflýjanleg staðreynd að á morgun verð ég ekki lengur tuttuguogeitthvað heldur eitthvað allt annað og ég er svo sniðug að í staðinn fyrir að bjóða sjálf í partí og læti þá hef ég látið bjóða mér í partí og læti, dinner und alles!!!

En fyrir þá sem verða á ferðinni á morgun, þá verða kaffi og HEIMABAKAÐAR kökur og gos heima hjá mér. Verið velkomin!!!

En núna ætla ég að fara heim að hvíla mig áður en ég fer að bjúttífúlla mig fyrir kvöldið! Ciao.

FYRSTA PRÓFIÐ

er búið.

Það var allt í lagi en kennaranum tókst samt að lauma inn spurningu sem maður átti ekki von á útfrá námsefninu en spurningin var samt ekkert útúr kú eða þannig en samt. Bullaði eitthvað.

Nú bíð ég bara eftir einkunninni sem verður vonandi nær 9.0 en 7.0. Það kemur í ljós.

Núna ætla ég að fara að hlusta á Dido.

og svo þetta:

ÉG ER AÐ FARA TIL LONDON!!! LIGGALIGGALÁI!!!

Til hamingju með afmælið, Sigurborg!

já, hún er nú orðin þrjátíu ára og ég verð það bráðum líka. Nema ég verði bara twentynine forever... ;o)

jæja, farin heim að læra og hætt að leika mér á netinu. Bleh!

helgin...

var góð. Ég tók því mjög rólega um helgina enda ekki vanþörf á eftir maraþon-vinnu og einangrun undanfarinna daga.

Á föstudaginn buðum við David Karine í mat, til að stytta henni stundir þar til kærastinn hennar kæmi (á lau morgun). Ég eldaði karríkássu - hvað getur maður eldað annað þegar maður hefur bara 2 hellur og engan ofn? Karrí klikkar aldrei og kássan var góð. Ég er líka svoddan kássukelling. Það verður eiginlega nonstop-kássa hjá mér í 10 vikur í sumar. Nema þá daga sem ég fæ kjötsúpu hjá hópunum.

Alla vega, á laugardaginn var frænkudagur. Það er eitthvað sem ég geri alls ekki nógu oft en ég býð stundum frænku minni (9 ára) að gista hjá mér og þá borðum við pizzu og nammi, förum stundum í bíó og ALLTAF í hárgreiðsluleik. Enda fór ég að sofa með 6 fléttur í hárinu... Svaka stuð!
Sunnudeginum eyddum við svo í Kringluráp og um kvöldið fór ég í bíó með David. Sá Kill Bill Vol. 2 og ég verð að segja það að mér finnst Quentin Tarantino góður!

Það var soldið fyndið um helgina að ég hitti Berglindi vinkonu þrisvar. Alveg óvart. Fyrst þegar ég var að bíða eftir pizzunni, svo í Kringlunni og loks í bíó. Annað hvort algjör tilviljun eða þá að hún er farin að sitja um mig...

Best að fara að læra, próf á fim! Wish me luck!

bleh bleh bleh

vaknaði í morgun og fattaði það að ég beilaði á saumólaumó í gær. Sorry girls!

Ég var bara svo ótrúlega útkeyrð í gær - m.a.s. áður en ég fór í vinnuna! - og ég var með geðveikan hausverk allan daginn þannig að ég fór beint heim eftir vinnu og lét renna í bað. Svo lá ég í freyðibaði í 1,5 klst., við kertaljós með góða bók og tónlist. Ótrúlega ljúft og ég þurfti hreinlega á smá "me-time" að halda.

Núna eru batteríin endurhlaðin og síðasti vinnudagurinn í bili. Á morgun er ég komin í langþráð frí eftir 10 daga vinnutörn en þá er David að byrja á næturvaktasyrpu. Alltaf gaman að vinna vaktavinnu og geta varla hitt kærastann nema rétt yfir blánóttina. Ef það er svo gott.

Jæja, ég er farin í vinnuna og svo hefst próflesturinn af fullum krafti á laugardag!

frídagurinn minn...

fór fyrir lítið. Var kölluð á aukavakt og gat ekki neitað. Reyndar var þetta bara stubbur, frá 13-16:30 en samt. Ég varð ótrúlega þreytt eftir þessa stuttu vakt og nennti engu í gærkvöldi. Núna bíð ég bara með óþreyju eftir frídeginum mínum á föstudag...

Annars hitti ég Önnu vinkonu mína frá Bolungarvík á mánudaginn. Ég hef ekki séð hana síðan hún kom með fjölskylduna sína í heimsókn til mín síðasta sumar. Við kíktum á kaffihús og í Kringluna. Það er langt síðan ég hef gert eitthvað svona, verið að slæpast í bænum með vinkonu. Þetta var mjög endurnærandi. Ætti að gera eitthvað svona oftar!

Ég er eitthvað svo andlaus núna að ég ætla ekki að hafa pistilinn lengri í dag - er bara að telja niður dagana þangað til ég fæ smá frí.
Frí frá vinnu til að hefja próflestur.

úff!

Í dag er sjöundi dagurinn í röð sem ég er að vinna. Bara átta tímar í dag en hafa verið allt að 16 tímar á dag undanfarna daga þannig að ég er pínuþreytt.
Og á morgun er frí.
Og á morgun verður líka dekur/afslöppunardagur með mínum útvalda.
Enginn lærdómur, ekkert leiðinlegt.
Bara afslöppun og rólegheit og allt rennandi gott og skemmtilegt!

Svo byrjar upplestrarfríið mitt á fimmtudaginn þannig að maður verður byrjaður að læra á þriðjudaginn í næstu viku, eða eitthvað svoleiðis...

enn um blóð...

já, ég ákvað að setja blóðbankann inn sem fastan hlekk á síðuna mína, bara svona til að hvetja þá sem aldrei hafa hugsað um að gefa blóð til að gera það og líka til að hvetja hina af stað sem eru búnir að vera á leiðinni égveitekkihvaðlengi...

Drífið ykkur nú af stað!

Ég gef blóð - en þú?

Dagurinn í dag hefur verið góður. Var byrjuð að læra snemma og var bara nokkuð dugleg. Fór svo og talaði við leiðbeinandann minn um lokaritgerðina mína og fékk fleiri punkta til að hugsa um. Þegar ég kíkti svo á póstinn minn seinni partinn, þá var komin staðfesting frá Flugleiðum um að flugið fyrir David, sem ég hélt að ég hefði verið að klúðra á laugardaginn, væri í góðu lagi! :o)

Skrapp svo í blóðbankann áðan og lét dæla úr mér. Á eftir sötraði ég kaffi og borðaði brauð á fínu kaffistofunni þeirra. Er nú mætt aftur uppí Hlöðu, endurnærð, til að halda áfram að læra. Eftir 2-3 klst hérna er planið að fara heim og horfa aðeins á video og fara svo að sofa.

Það er langt síðan ég hef átt svona pródúktívan dag og um leið frekar afslappandi.

meira um skemmtilega texta

ég kíkti aðeins hingað inn eftir ábendingu úr athugasemdunum mínum og þetta er ansi skondin síða. Ég er viss um að húsmóðirin í Vesturbænum hefur gaman af þessu... og örugglega fleiri.

annars sit ég í Hlöðunni og þykist vera að læra :o) Langar einhvern í kaffi?

ég barasta varð...

að skella þessum hlekk inn, fyrir mig og Ernu.
Og alla hina sem eru líka að reyna að rifja textann upp...

OG ALLIR AÐ SYNGJA MEÐ NÚNA!

algjörlega gagnslaus dagur!

Ég er nú búin að sitja síðan klukkan hálfellefu í morgun fyrir framan tölvu að leita að hagstæðu fargjaldi (peningalega séð og tímalega séð) fyrir minn útvalda til Frankfurt í júní. Hann er nefnilega á leiðinni heim í smá frí og fær gefinn miðann frá Frankfurt til Kanada. Maður skyldi nú halda að þetta væri ekki mikið mál, sér í lagi þar sem undirrituð hefur starfað í tæp 3 ár á ferðaskrifstofum við að gera nákvæmlega það sem ég var að gera í dag.

EN þetta tók allan þennan tíma og er eiginlega ekki afgreitt ennþá! Málið er það að eftir ýmsar skoðanir hjá ýmsum flugfélögum þá virtust þessir -JÁ, ÓTRÚLEGT EN SATT- hafa uppá besta dílinn að bjóða, með smá krókaleiðum þó. En þegar til kastanna kom, að negla niður flug og annað þá breyttust hlutirnir aðeins og það kostaði eitt símtal til að laga það en svo fór ég til að klára málið á netinu og þá var aftur lofað öllu fögru en þori samt ekki alveg að trúa því. Núna bíð ég eftir endanlegri staðfestingu á email um að hlutirnir séu í lagi.

GUÐI SÉ LOF AÐ ÉG ER EKKI AÐ VINNA Á FERÐASKRIFSTOFU LENGUR!
eitt það leiðinlegasta sem ég hef gert og í framtíðinni mun ég frekar skúra en að vinna í söludeild á ferðaskrifstofu!
OG HANANÚ!!!

Þessi flugmiðaeltingarleikur á netinu þýðir það að ég hef ekki komið neinu í verk hvað lærdóm varðar og núna er ég eiginlega bara búin á því og hef enga orku í það lengur. Sér í lagi þar sem stofnunin sem ég þyrfti að heimsækja lokar eftir rúmar 50 mínútur... Alltaf sama góða þjónustan á þessu blessaða landi :(

ooog... MIG LANGAR Í FARTÖLVU!

syngið með!

Ég kom sjálfri mér svolítið á óvart um daginn. Eiginlega svo mikið að ég varð sjálf orðlaus. Þannig var að ég var að keyra í bílnum mínum og var að hlusta á útvarpið, svona rétt eins og ég geri á hverjum degi. Svo kom lag (Holding back the years m. Simply Red) sem var uppáhaldslagið mitt þegar ég var 10 eða 11 ára og ég hef ekki heyrt það í skrilljón ár þannig að ég hækkaði í botn og byrjaði að syngja með. Svaka stuð.
Alveg þangað til að ég fattaði að ég skildi ekki orð af því sem ég var að syngja.
Ég hef greinilega 'lært' þennan texta áður en ég var farin að tala ensku af nokkru viti þannig að textinn sem kom uppúr mér var algjört bull!

Fyrst varð ég orðlaus en svo gat ég ekki annað en hlegið! Og núna dauðlangar mig að heyra lagið aftur og HLUSTA á textann.

Annars var ég að koma af fundi hjá þeim og komst ma. að því að sumarið mitt byrjar í kringum 20. júní þegar ég kemst á fjöll aftur. Ég hlakka svo til!!!

eitt enn:

stutt blogg!

jamm, bara til að láta vita að ég er á lífi... hef ekki komist í tæri við tölvu í tæpa viku núna. Hef svo sem ekkert að segja en rakst inná þessa síðu þökk sé hinum drekanum. Þarf að skoða þetta nánar, ég setti líka hlekkinn undir SKOÐIÐ ÞETTA!.

heyrumst síðar!

Stína í öskutunnunni...

...er ennþá til, mér til mikillar armæðu. Hún var mitt alterego á mínum fyrstu árum og ég hélt ekkert mjög mikið uppá hana. Hún kom nefnilega fram þegar ég var eitthvað ósátt og/eða að frekjast við foreldra mína og bræður og fékk ekki mínu framgengt. Sem sagt, þegar ég var lítil og í fýlu. Þá upphófst samtal sem var einhvern veginn svona:

Mamma: “Jæja, Stína, ert þú komin aftur. Hvar er hún dóttir mín?”
Ég: “Ég heiti ekki Stína. Mamma, ég er Ella Maja.”
Mamma: “Nei, hún Ella Maja mín, lætur ekki svona. Þú ert Stína í öskutunnunni!”
Ég: “Nei, mamma, ég ER Ella Maja!”
Mamma: “Stína mín, viltu ekki bara fara í öskutunnuna og senda hana Ellu Maju mína til mín aftur?”
Ég: “En mamma, ÉG ER ELLA MAJA!”

Þannig að til að sannfæra móður mína (föður/bróður) um að ég væri ég en ekki einhver ljót stelpa sem bjó í öskutunnunni þá þurfti ég að haga mér vel og það virkaði yfirleitt. Verst fannst mér samt að þessi Stína flutti með okkur úr Þorlákshöfn í Garðabæinn þegar ég var þriggja ára.

Og nú hef ég sem sagt komist að því að hún er ennþá til. Hún kom nefnilega fram á yfirborðið í lasleika mínum síðustu daga. Ég var með smá hita, ótrúlega slöpp, þreytt og stressuð. Ég gat nefnilega ekki leyft mér að sofa bara og slappa af til að ná þessu úr mér og auðvitað bitnaði þetta allt á mínum útvalda. Og þá fékk ég að heyra þetta:

“Þú ert enn jafn falleg og jafngóð en þú ert ekkert skemmtileg núna. Þú ert ekki sú Elísabet sem ég þekki. Ég vil fá mína Elísabetu aftur.”

Þannig að ég held að Stína í öskutunnunni hafi tekið völdin af mér í örfáa daga en nú er hún farin. Sem betur fer. Ef eitthvað er, þá finnst mér hún enn leiðinlegri núna en fyrir tæplega 30 árum síðan...

vonlaus!

jamm, ég er vonlaus! algjörlega hópless keis! ég þóttist vera hætt þessum netprófum en svo tek stóran og góðan bloggrúnt og finn þá ýmislegt og til dæmis núna, þá varð ég barasta að komast að því hvaða "Mythical Beast" ég er eftir að ég gleymdi mér augnablik hérna.

Með öðrum orðum, ég nenni ekki að læra. Það er erfitt að halda einbeitingu þegar maður er hálflasinn með einhverja hitavellu.

En hér er ég:

You're a dragon.
You're smart and cunning,
and enjoy taking risks.
Your need for independence is an advantage,
but sometimes it alienates you from others.
As far as *good* and *evil*,
you're pretty neutral--but you may have
something of a wicked streak.

hvaða mythical beast ert þú? frá Quizilla

æ, mig auma!

ég er lasin og búin að vera það síðastliðna 2 daga en hef engan tíma til þess að taka því rólega og láta mér batna, heldur er ég á haus í alls kyns verkefnum og sit núna í bókhlöðunni og vinn að fyrirlestri sem ég á að flytja á þriðjudaginn.

öllum er velkomið að koma og trufla mig og þið munuð finna mig á 3. hæð í hlöðunni...

kaffi og smáspjall

mig langar í kaffi og smáspjall núna, er einhver sem á leið í National Book Barn NÚNA sem langar í kaffisopa með mér?!?!?!

mér leiðist og mér er kalt!

Þökk sé...

Gonzo
fyrir að senda mér rétta hlekkinn að prúðuleikaramyndinni minni. Er ég ekki fín sem sænski kokkurinn?

Á meðan ég man, þá getið þið lesið meira um stolna hjólið hans Davíðs hjá honum sjálfum...

verðugur kandídat fyrir Darwin Awards

Ég er enn að hlæja að þessari frásögn sem ég las í gær hjá bókasafnsfræðingi Heljar. Tékkið endilega á frásögninni þar sem hefst á þessum orðum: David's bike was stolen yesterday.

Ef þessi gaur heldur áfram á sömu braut, þá á hann eflaust eftir að vera nefndur til Darwin Awards í framtíðinni. Verðugt takmark í sjálfu sér.

ÉG VEIT... ÉG VEIT...

ég þóttist vera hætt að þessu en ég hreinlega barasta varð!!!! Allt henni að kenna, hún er með þetta á síðunni sinni... Ég meina, hver vill ekki vita hvaða prúðuleikari hann er!?!?!?!


You are the the Swedish Chef.
You are a talented individual, nobody understands you.
Perhaps it's because you talk funny.

FAVORITE EXPRESSION:
"Brk! Brk! Brk!"
HOBBIES:
Kokin' der yummee-yummers
FAVORITE MOVIE:
"Wild Strawberries...and Creme"
LAST BOOK READ:
"Der Swedish Chef Kokin' Bokin'"
QUOTE:
"Vergoofin der flicke stoobin mit der brk-brk yubetcha!"
hvaða Prúðuleikari ert þú? komið frá Quizilla

þetta er líka á síðunni hennar:


hver ert þú í skóginum hans Bangsímon?

soldið skemmtilegt próf, amk fyrir barnafólkið, n'est-ce pas?

USSS!!! ekki trufla mig!

ég er nefnilega í bókhlöðunni að læra. Um Snorra goða, að reyna að finna 'almæltu' söguna hans útúr öllum þeim Íslendingasögum, Biskupasögum og öðrum sögum sem á hann er minnst í...

Dagurinn í gær var góður. Mjög góður. Fór að lyfta, kíkti svo aðeins á gamla settið og mætti í skólann. Eftir tíma ætlaði ég að vera svakalega dugleg að læra en Kanadamaðurinn hringdi í mig og honum leiddist þannig að ég fór til hans og við gerðum nákvæmlega ekki neitt annað en að vera 'silly and giggling'. Það var mjög endurnærandi.
Síðan kíktu Thom (USA) og Karine (CAN) aðeins í heimsókn um kvöldið og ég fræddist aðeins meira um muninn á Kanada og Bandaríkjunum... sígilt umræðuefni í nærveru Kanadabúa og Bandaríkjamanna.
Svo heim að sofa.

En í dag verður ekkert 'silly, giggling þema' - bara hard core lærdómur!

"Hann Grettir er mér svo hugleikinn"

Já, ég blaðaði meðal annars aðeins í Grettis sögu í afslöppuninni um síðustu helgi og ég held að ég skilji hana Kristbjörgu ofurleiðsögumann nokkuð vel en hún á einmitt titilinn að færslunni í dag. Af því að ég skemmti mér svo rosalega vel yfir gluggeríinu í sögu Grettis Ásmundarsonar þá langar mig að deila nokkrum vel völdum köflum með ykkur...

…en Grettir leiddi uxann, ok var hann mjök stirðr í böndunum, en allfeitr; varð honum mjök mætt. En þá er hann kom neðan hjá Tittlingsstöðum, þraut uxann gönguna. [...] sá þeir hvar maðr fór í móti þeim ok hafði naut á baki, ok var þar kominn Grettir ok bar þá uxann; undruðusk þá allir, hversu mikit hann gat orkat.

Honum gerði hermt um sauðina, ok þreif tvá ok kastaði forbrekkis, svá at þeir lágu í óviti. Ok er hinir sá þat, gengu þeir at ódjarfliga. Grettir tók sauðina ok krækði saman á hornunum ok kastaði um sína öxl hvárum tveim; gekk síðan upp í bæli sitt.

Hann sá, at þrír menn riðu sunnan yfir Hítará, ok skein á skrúðklæðin og smelta skjölduna. Gretti kom nú í hug, hverir vera mundu, ok þykkisk munu þurfa at fá sér eitthvert plagg af þessum.
þessir menn voru einmitt að leita að honum, sauðaþjófnum og útlaganum og fór Grettir á móti þeim og:
Gretti leiddisk nú þófit,ok sveipaði til saxinu ok hjó annan fylgdarmann Gísla banahögg.

Já, svona karlmenn eru víst vandfundnir í dag.

Annars var ég að klára þessa bók eftir þennan kanadíska rithöfund og er búin að bæta henni á listann hér til hægri. Bókin kom út 1969 og það sést á henni varðandi ýmis viðhorf sem koma fram, t.d. varðandi reykingar og drykkju áfengra drykkja á meðgöngu, viðhorf sem hafa breyst í dag. Bókin er góð og skondin á köflum. Er þegar byrjuð á annarri bók eftir hana, Cat's Eye, skelli henni á listann við tækifæri.

Jamm, mín á fullu við að öðlast innsýn inní kanadíska menningu.

helgin var...

ALLTOF STUTT!
Bara fimmtudagur fram á mánudag... Það var rosalega gaman og mikið étið, drukkið, sulllað í pottinum, hlegið, talað og bara almennt séð skemmt sér! og við erum nú vel maríneruð af hvítlauk og chili.

Þetta er í fyrsta sinn sem ég fer í sumarbústað og fer ekki út fyrir veröndina allan tímann. Ótrúlega góð afslöppun, mæli með þessu. Og ótrúlega leiðinlegt að koma aftur til byggða en maður verður víst...

barnshafandi?

Það er alveg ótrúlegt en þegar maður er kominn í fast samband, þá má maður ekki minnast á það að manni sé bumbult, ómögulegur í maganum, með mikla matarlyst eða að maður þurfi að fara oft á toi-ið því þá fær maður nánast alltaf þessi viðbrögð:

“núúú, ertu kannski barnshafandi?”

og grandskoðandi augnaráð í kjölfarið til þess að það fari nú örugglega ekki framhjá viðkomandi ef maður skyldi fara undan flæmingi. Stundum verður maður svo meðvitaður um þessa spurningu að það er örugglega alveg eins og maður sé að ljúga þegar maður kemur með sitt mest sannfærandi NEI.

Og til að hafa það alveg á hreinu, þá er ég EKKI barnshafandi. Hins vegar frétti ég af einni óléttu í gær og veit um eitt barn sem kom í heiminn í dag – eða er á leiðinni í þessum skrifuðum orðum!

skemmtilegar myndir!

ég var að skoða síðuna sem heitir börn og fullorðnir í bolungarvík hér til hægri og það er komið inn fullt af myndum í viðbót. Þar af eru nokkrar myndir úr ríkidæmi mínu til fjalla ;o) og ég fæ alveg svakalegt kitl í magann og fiðring í hjartað þegar ég skoða þær myndir! t.d. þessa!

Ég hlakka svo til sumarsins!!! Hverjir ætla að koma í heimsókn?

"Vergjarnar og veðurbitnar valkyrjur"

veit einhver hvaðan ég greip þennan titil?

ég er Severus Snape!

er það ekki bara nokkuð kúl?


Hver ert þú í Harry Potter? frá SjóræningjaÖpum ehf.

annars er ég komin með nett ógeð á þessum innihaldslausu netprófum, drepur alltof mikið af heilasellum. En svona er það þegar maður er hlandlaus eins og ég hef verið undanfarna daga (vikur?). Ég hef bara hreinlega ekkert að segja eins og er.

Það sem er á döfinni hjá mér núna er að í dag ætla ég að púsla saman IKEA-rúminu mínu og á morgun fæ ég dýnurnar og get þá farið að sofa í rúmi. Og hætt að sofa á dýnu á gólfinu.
Ég hlakka svo til!!!
Svo á fimmtudaginn ætla ég að stinga af úr borginni og eyða helginni í sumarbústað í Húsafelli!
Ég hlakka svo til!!!

ný vinkona!

tja, kannski ekki svo ný, en nýbyrjuð að blogga aftur og ég er búin að hlekkja hana við mig! Allir að fara að skoða hvað Jamie hefur að segja, um Ísland og lífið.

nafnabreytingar...

já, þar sem að mér er nýorðið ljóst að ég er ekki drottning heldur gyðja þá hef ég breytt titlinum á blogginu mínu á viðeigandi hátt... og þar sem ég fékk líka orð í eyra í gærkvöldi fyrir að mismuna fólki, þá þekki ég víst enga kennslukonu lengur heldur bara dulúðuga konu.
Nice to meet you, mystery woman.

"Life is like a box of chocolates..."

Forrest Gump!


hver er kvikmyndin þín
brought to you by Quizilla

svona er ég nú andlaus-hlandlaus í dag, get ekki einu sinni lært heldur væflast um á veraldarvefnum og eltist við ónytsamleg próf. Þetta var nú soldið skemmtilegt því Forrest Gump er ein af þeim myndum sem ég get horft á aftur og aftur og aftur... Hún skilur eftir svona góða tilfinningu í manni.

GÓÐA HELGI!

föstudagur, again!

ég ligg undir ámæli fyrir bloggleti en ég er bara hálfandlaus-hlandlaus þessa dagana en hey, það er allt í lagi! því ég er...



...GYÐJA!

hver ert þú? brought to you by Quizilla


so don't mess with me!

jæja, þá er komin föstudagur.

Og ég gleymdi að athuga hvort þriðjudagar væru góðir dagar af því að þá er svo stutt í helgina eins og vinkona hennar lýsti yfir um daginn. Ég man það kannski í næstu viku.

Ég er búin að sofa of lengi í dag og taka því rólega heima hjá mér með kaffibolla og lesa þessa teiknimyndasögu (Davíð er að reyna að koma mér á bragðið).
Ég er búin að vaska upp og taka aðeins til.
Ég er búin að versla og eyða smá pening í Kringlunni, meðal annars í þessari búð og þessari líka (það eru 'danskir dagar' þar núna og dönsk tónlist ómar um búðina).
Ég er líka búin að vera í Bókhlöðunni í 2 klst. að læra. Og slæpast. En samt aðallega að læra.

Núna ætla ég að athuga hvort gæinn minn sé nokkuð farinn að sofa, hann er nefnilega að fara á næturvakt í nótt einsog alltaf þegar ég á fríhelgi! Svo ætla ég að bruna í föðurhúsin og gæða mér á silungi að hætti mömmsunnar minnar!

GÓÐA HELGI!

viðbót

var að bæta einum hlekk við í BÖRNIN en það eru ekki bara börn í nýja hlekknum heldur líka fullorðnir, semsagt heil fjölskylda!

blogga meira seinna, er hálfandlaus þar sem allur andi minn fór í fyrirlesturinn sem ég var að flytja áðan...

sko, hvað sagði ég?

Það er rok í Reykjavík og örugglega rokk líka en hins vegar var ég bara næstum því fokin þegar ég var að hlaupa á milli húsa áðan en ekki rokkuð...

Rok í Reykjavík

Það er rok í Reykjavík í dag. Langaði bara að deila því með ykkur.

not so much FYLLIBYTTA after all...

eða ég held ekki.

Fullið kom ekki á fimmtudaginn en þó rann rauðvínið ljúflega niður með karrípottréttinum mínum og það var mikið og lengi spjallað um allt milli himins og jarðar og það á tveimur tungum. Ég er svo multicultural... ;o)

Fullið kom heldur ekki á föstudaginn og ég beilaði mas. bæði á vísindaferðinni og á Eivöru. Shame on me! En í staðinn átti ég "quality time" með mágkonu minni og yngstu frænku. Hún er nýorðin tveggja ára og hún eyddi allri heimsókninni minni í því að segja mér að fara (afþvíað ég var eitthvað að segja henni að fara ekki svona illa með köttinn) en svo þegar ég 'loksins' fór, þá sagði hún:
"Am'la, ekki fara. EKKI fara."

Ég átti svo "more quality time" um kvöldið en þá með mjög góðri vinkonu og við spjölluðum um 'alt muligt' og sötruðum smá bjór og hvítvín með. Og spiluðum fullt af minningalögum. Det var dejligt!

Fullið kom hins vegar aðeins á laugardaginn. Og þá var sko gaman!!! Hjartadrottningin á svo skemmtilega fjölskyldu og þekkir svo frábært fólk. Núna bíð ég spennt eftir brúðkaupsveislunni hennar og BS-veislunni. Whatever comes first!

ps. am'la er hvernig tveggja ára barn segir ellamaja - þetta er ekki í fyrsta sinn á ævinni sem ég er kölluð þessu nafni - svo þróast það síðar meir útí ammalæja

fullin sem eru framundan...

í kvöld er ég með gesti í mat og það þýðir rauðvín með matnum og svo kaffi og koníak á eftir. Aldrei að vita hvernig það endar.

á morgun er fyrirhuguð vísindaferð með þeim og svo tónleikar með Eivöru Pálsdóttur á Stúdentakjallaranum á eftir. Vísindaferð þýðir bara eitt: OFURÖLVUN fyrir kl. 20

á laugardag er útskriftarveislan hennar! Það þýðir stuð og meira stuð og meira áfengi.

ég er fyllibytta.

evrópan mín

ég þarf greinilega að fara að heimsækja austurevrópu!



hvernig lítur þín evrópa út?

ein bók í viðbót...

já, ég var að bæta bók inn á listann minn til hægri, Napóleónsskjölin eftir Arnald. Ég var nú ekki alveg að kaupa plottið, ammrískir sérsveitarhermenn skjótandi á eftir fólki í miðbænum... En alltílagi afþreying samt.

Og ég lærði það að hundurinn hans Hitlers hét Blondie.

föstudagskvöldið...

var alveg ágætt.

Ég var að vinna aðeins í aukavinnunni minni í gær og þar var 16 ára stelpa í uppvaskinu sem ég spjallaði aðeins við á meðan við borðuðum. Samtalið var eitthvað á þessa leið:

ég:
"Úff, ég nenni eiginlega ekki út í kvöld!"

hún:
"Ertu að fara eitthvað?

ég:
"Já, vinkona mín var að kaupa sér íbúð og var að bjóða í smá teiti."

hún, í hneykslunartón:
"Og ætlarðu ekki að fara!?"

ég:
"Jú, auðvitað fer ég en eins og er langar mig mest heim að lesa eða eitthvað."

hún, í enn meiri hneykslunartón:
"Ég myndi sko aldrei nenna því."

Mér fannst þetta bara svo skondið! Ég fór svo til vinkonu minnar og þar voru svo fleiri vinkonur hennar sem voru alveg æstar í að komast í bæinn, á tjúttið. Og mér til mikillar gleði, var vinkona mín alveg jafnþreytt og óupplögð og ég! Þannig að eftir að skvísurnar röltu af stað í bæinn þá dró hún fram myndaalbúm sem við skoðuðum og svo keyrði ég heim.
Sem sagt, rólegt og gott kvöld fyrir mig.

aumingjablogg!

jamm, það er bloggið mitt þessa dagana, hef verið að vinna nánast daglega síðan síðast og þá virðist ég glata tengslum við umheimin...

Annars er það að frétta að síðan síðast er ég byrjuð að gera magaæfingar og búin að læra að hekla! Þetta eru kannski ekki merkileg afrek en eins og er þá bústar þetta aðeins egóið mitt.

Ég er nefnilega stundum svoddan bjáni. T.d. þegar ég tók þá meðvituðu ákvörðun um að gera aldrei magaæfingar þegar ég fer að æfa. Jebb, ég tók þá ákvörðun einhvern tímann í fyrra. Eða árið þar áður. Það var amk á þessari öld. Málið er bara það að magaæfingar eru leiðinlegustu æfingar sem ég geri nema ef ég kem þeim uppí rútínu og hætti að taka eftir því að ég sé að gera magaæfingar. En eftir að ég skipti um líkamsræktarstöð fyrir nokkrum árum þar sem aðstaðan er öðruvísi, en síst verri, en á gamla staðnum þá hef ég einhvern veginn ekki getað komið magaæfingunum í fasta rútínu og annað hvort pínt sjálfa mig til að gera æfingarnar eða hreinlega sleppt þeim. Svo einn daginn var ég orðin þreytt á þessum skrípaleik og ákvað að hætta bara að gera magaæfingar þar til að mig langaði að gera þær aftur. Það leið heilt ár (eða meira) þar til ég ákvað að láta til skarar skríða á ný, sem var í síðustu viku.

Ég virkilega finn það að ég er með alveg geðveikt flott 'sixpack' en oh my god, það líður sko á löngu þar til að það kemur í ljós...

og svo lærði ég að hekla í gær.

var að bæta við...

lista yfir það sem ég hef lesið á árinu, þeas sem afþreyingu. Ég hef hugsað mér að bæta inn hlekkjum jafnóðum og ég klára fleiri bækur og vona að einhverjir hafi gaman af... Helsta áhyggjuefni mitt varðandi þennan lista er að hann gæti orðið soldið langur en það kemur bara í ljós.

Við þetta vil ég bæta að þessar 4 bækur sem eru komnar er allar mjög góðar. Ég var að klára Reisubókina í gær og sat sem töfruð yfir henni. Hið sama má segja um Da Vinci lykilinn sem ég kláraði á einni helgi. Um Hobbitann og Tolkien er óþarft að segja nokkuð. Alveg frábær!

Ef þið hafið ekki lesið þessar bækur, þá endilega drífið í því og gaman væri að heyra hvað ykkur finnst um þær og jafnvel uppástungur um hvað ég ætti að lesa næst...

hvers á maður að gjalda?

...fyrir að vilja vera sprækur og hress á sunnudegi og vilja taka daginn snemma. Ég bara spyr.

Ég fékk nefnilega þessa snilldarhugmynd á laugardaginn að taka daginn í gær með trompi og vera ofuraktív; vakna snemma, drífa mig í ræktina, svo heim að læra til að vera búin að afkasta miklu fyrir kvöldið til að geta mætt með hreint hjarta og bros á vör í saumaklúbbinn. EN...

Fyrsta skrefið til að ná tilsettum markmiðum gærdagsins var að sofa heima hjá Davíð, hann var nefnilega á næturvöktum um helgina þannig að það var tilvalið að láta hann vekja mig með kaffibolla og kossi þegar hann kæmi þreyttur heim til að fara að sofa kl. 8. Mín snjöll eða hvað? Þetta virkaði mjög vel og ég líka í þessum súpergír þegar klukkan var rúmlega 9 og ég komin fyrir utan Hreyfingu en þar var engin hreyfing.

Það opnar nefnilega ekki fyrr en kl. 10 á sunnudögum.

frábært. NOT!

Huxihux! Ný hugmynd! Ég dreif mig uppí skóla til að netast aðeins og prenta út glósur og svo ætlaði ég sko að halda fyrra plani og drífa mig í ræktina kl. 10. Ég kom uppí skóla og þar var heldur engin hreyfing. Og ekkert ljós heldur. Afhverju?

Jú, vegna þess að húsnæði Háskólans opnar í fyrsta lagi kl. 10 á sunnudögum. Ef það opnar yfir höfuð!

ARGogGARG! ARGogGARG!

Þetta fór alveg með mína vandlega undirbúnu löngun til dugnaðar þann daginn. Ég fór heim og lagðist uppí sófa með Fréttablaðið. Nennti ekki einusinni að byrja að læra fyrr en seint og síðar meir.

WANTED! WANTED! WANTED!

Já, mig vantar smá hjálp. Mig vantar góða uppskrift/leiðbeiningar um það hvernig er best að elda hvalkjöt. Ég er búin að leita á netinu og finn ekkert. Eða jú, ég finn eitthvað en ekki það sem ég er að leita að. Niðurstöðurnar af þessari síðu skiluðu meðal annars þessu og þessu. Hjálpar mér ekki mikið. Annars gæti nú verið spennandi að sjá hvort manni tækist að búa til hval úr einu blaði...

Mér finnst að einhver hvalkjötssnillingurinn ætti að taka sig til og búa til svona hvalkjöt.is-síðu, bara svona til þess að mismuna ekki kjöttegundum. Það er jú til nautakjötssíða, svínakjötssíða og lambakjötssíða!
Í fljótu bragði virðist mér líka vanta kjúllasíðu.

Látið mig endilega vita ef þið hafið einhverjar ábendingar, ég ætla að fara að drífa mig í þessa búð og sjá hvort ég fái ekki hvalkjöt þar...

ps. eftir allar þessar vangaveltur og kjötumræðu þá hef ég komist að því að mér finnst orðið kjöt ljótt orð. Sérstaklega í eignarfalli: kjöts. Þetta var víst tótallí bísæd ðe pojnt.

að eiga ekki tölvu er...

FÚÚÚÚLT!

ég sit núna í Odda og ætlaði að blogga um eitthvað skemmtilegt en rétt í þessu birtist stór og ófrýnilegur maður og sagðist ætla að fara að loka þannig að... ekkert blogg í dag.

GÓÐA HELGI!

sólheimar eða sólheimur?

Ég fór og hitti yfirmann minn í gær, vegna sumarfrísskipulagningar og fleira... Þegar hún sá mig sagði hún:

"Þú ert alltaf svo hress og kát!"

Ég vissi ekki alveg hvað ég átti að segja svo ég brosti bara. Sólheimabrosinu mínu sem hefur ekki farið af mér síðastliðna 5 mánuði. Svona er nú gaman að vera ástfanginn!

Þetta var væm vikunnar.

sjóræningjar!

Ég er bara nýlega búin að sjá myndina Pirates of the Caribbean því ég var á fjöllum þegar hún var í bíó. Ég verð nú bara að segja það að þessi mynd kom mér á óvart, því hún var þrælskemmtileg og góð. Betri en ég bjóst við. Ekki spillti það fyrir að elsku kallinn, hann Johnny Depp, var aðalstjarnan. Ég veit ekki af hverju en ég stenst þennan mann ekki. Hann hefur einhver töfrandi áhrif á mig og ég sem hrífst nú yfirleitt ekki af svona fíngerðum, snoppufríðum mönnum eins og þessum til dæmis. Ég vil hafa þá meira svona 'ruggedly handsome'. Eins og LadyMary...

Og nú bíð ég spennt eftir framhaldinu af ævintýrum Captain Jack Sparrow og félaga...


...og er þetta þá ekki viðeigandi í lokin?



HVAÐA SJÓRÆNINGI ERT ÞÚ?!?

HEIMURINN MINN!

Svona lítur heimskortið mitt út þegar ég er búin að merkja inn þau 17 lönd sem ég hef heimsótt í heiminum hingað til... Það gera heil 7% af heiminum. Ég hef tekið góðan rúnt í Evrópu og skoppað aðeins í Afríku og Asíu en ég á báðar Ameríkurnar alveg eftir. Það stendur allt til bóta...



Hérna getið þið hin búið til ykkar eigið heimskort. Góða skemmtun!

svei mér þá!

þetta virkar barasta strax! Flott hjá þér, ellamaja! já, stundum verður maður að hrósa sér sjálfur...

Ég vil líka vekja athygli á nýjasta hlekknum mínum, hérna neðst til hægri. Þar getur maður skoðað merkingu nafnsins síns og séð hversu margir bera nafnið og ýmislegt fleira...

bjáninn ég...

Ég var víst búin að lofa því að græja kommentin í gær og ég reyndi en það skilaði ekki miklum árangri... og nú skal ég segja ykkur hvers vegna.

Ég er ekki í neinum tímum á miðvikudögum og var bara heima að læra í gærdag en svo ákvað ég að kíkja aðeins á tölvupóstinn minn og uppfæra athugasemdakerfið mitt í gærkvöldi. Ég kom inn í Odda rúmlega níu í gærkvöldi og valdi mér stöðu við kennaratölvuna í stofu 102. Eitthvað sem ég geri vanalega aldrei og eitthvað sem ég á aldrei eftir að gera aftur! Ég hugsaði nefnilega með mér, þegar ég valdi mér sæti, að ég ætlaði nú að sitja á stað þar sem fólk væri nú ekkert að kíkja yfir öxlina á mér og skoða það sem ég væri að gera! Jamm, ein frekar paranoid.
Alla vega, þegar ég var búin að sitja dágóða stund þá kemur strákur inní stofuna og mér verður litið til hans og sé þá útundan mér eitthvað á veggnum. Eða réttara sagt tjaldinu. Ég leit betur á tjaldið og þá blasti barasta við mér nákvæmlega það sem ég sá á tölvuskjánum hjá mér. Ergo, skjávarpinn sem er tengdur við kennaratölvuna var í gangi og varpaði öllum mínum tölvuhreyfingum á tjaldið! Mér varð svo um að ég bara flýtti mér að slökkva á öllu sem ég var að skoða og logga mig út og dreif mig bara heim.
Þannig fór um sjóferð þá.

Ég var einmitt í miðju kafi að lagfæra kommentakerfið þegar mér varð ljóst að allt sem ég var að gera væri á skjávarpanum!

Nóg um það í bili, núna ætla ég að fara að laga það sem ég byrjaði á í gær...

eitt enn sem ekki má gleymast!

hún á afmæli í dag
hún á afmæli í dag
hún á afmæli, hún Marý
hún á afmæli í dag!

VEEEIII!!! HÚRRAAA!!!

og líka vei! og húrra! til þeirra afmælisbarna sem ég hef gleymt í janúar!!! og þau eru ansi mörg...
Harpa 6. janúar
Anna Lilja 17. janúar
Erna 17. janúar
Bryndís 20. janúar

Allar eru þessar skvísur orðnar 29+. TIL HAMINGJU MEÐ ÞAÐ, STÚLKUR!

p.s.

öhömm... ég stefni að því að fikta eitthvað í kommentakerfinu mínu á miðvikudag, þangað til verðið þið bara að senda mér póst ef þið hafið þörf á að tjá ykkur við mig...

janúarblús...

þótt titill þessarar færslu gefi til kynna að ég sé eitthvað ‘blue’ þá er það alls ekki málið en þessi mánuður hefur verið frekar erfiður að vissu leyti og ég hef komist að því um sjálfa mig að ég er mun meiri reglu-og öruggisfíkill en mig nokkurn tímann óraði...

Það er langt síðan að ég hef sukkað svona mikið í mat og svefnóreglu um jól og áramót eins og ég gerði núna síðast og það er rétt núna, þegar það er bara vika eftir af janúar, sem ég er að koma stjórn á svefnmynstur mitt!

Þessi svefnóregla undanfarnar vikur hefur gert það að verkum að ég hef varla gert handtak heima hjá mér og þar sem ég á enn eftir að taka uppúr nokkrum kössum þá böggar þetta mig alveg svakalega. Kannski af því að það þýðir óreiðu og óreglu í kringum mig eða kannski bara af því að ég ætla ekki að leyfa mér að kaupa mér rúm fyrr en allir kassar eru tómir... Sef bara á dýnu á gólfinu eins og er. Það er orðið frekar þreytt. ‘Glansinn’ er alveg farinn af því að sofa á gólfinu í hálftómri risíbúð!

Reyndar er það svo undarlegt með mig að ef að það er of mikil óreiða heima hjá mér þá fúnkera ég ekki á öðrum sviðum, amk. illa. Ef að það er óskipulag heima fyrir þá get ég ekki skipulagt mig útávið heldur.
Do I sound crazy or what?

Þetta er nú svona smám sama að komast í lag, ég fer að fara að sjá fyrir endann á þessu. Undanfarið hef ég verið að dunda mér við að lakka ljóta IKEA-dótið mitt kóngablátt og er nú búin að púsla því saman í svona minihillusamstæðu sem ég er barasta nokkuð ánægð með.

Yfir í annað. Ég er bara nokkuð sátt við einkunnirnar mínar fyrir haustið, sérstaklega síðustu einkunnina sem kom mér svo mikið á óvart að ég hringdi fyrst í kærastann og svo í vinkonu til að monta mig og vakti þau bæði! Samt var klukkan orðin 11 en þau voru reyndar bæði lasin... 7,5 í meðaleinkunn fyrir 20 einingar og 60% vinnu með skóla, það er nokkuð gott. Er það ekki?

Það besta er kannski það að ég er loksins búin að ákveða viðfangsefni BA-ritgerðarinnar minnar! Það var heilmikill léttir að vera búin að ákveða það og geta farið að lesa sér til og undirbúa sig. Ég hlakka svo til að byrja!!!

Eins og ég sagði í upphafi hefur mér alls ekkert liðið illa og ég er að átta mig á því að mér líður alveg ótrúlega vel í lífi mínu þessa stundina, það er einhvern veginn allt eins og það á að vera.
Tja, nema kannski óreiðan heima hjá mér en það er allt í vinnslu...

úff! ég sökka feitt!!!

jamm... hef ekki bloggað lengi og hef ekki einusinni gefið mér tíma í að laga kommentin mín og er barasta algjör lúser... ég lofa að þetta komist í lag mjög snarlega en samt ekki í dag...
hafið þolinmæði elsku vinir...

stjörnuspá og upphafogendir

Eina stjörnuspáin sem ég les núorðið er stjörnuspáin sem Röskva birtir ávallt í janúarblaði sínu. Samkvæmt þessari spá mun árið 2004 vera svona fyrir naut eins og mig:

Ást, friður og jafnvægi. Þetta þrennt mun einkenna árið hjá þér. Og, já eitt annað; Leoncie, indverska prinsessan mun hringja í þig og segja: "Barnadumig". Sértu kvenkyns, þá ertu heppin því að þú hefur löglega afsökun.

Svo mörg voru þau orð. Og mikið rosalega er ég heppin að vera kvenkyns!

Í dag er Bestaskinnið mitt að fara að skila inn BA-verkefninu sínu. Lokaskil, hún útskrifast í febrúar. Í næstu viku er ég svo að fara að hitta leiðbeinandann minn fyrir mitt BA-verkefni. Endir hjá henni og upphaf hjá mér... svona er lífið.
TIL HAAAMINGJU BESTASKINN!!!

En núna ætla ég að bregða mér bæjarleið og fara að hitta Leiðsöguskólagengið mitt í hádegismat á Reykjavík Bagel Company. Verði okkur að góðu!

er að lifna við aftur...

já, maður er svona smám saman að skríða útúr 'próf/jólastressinu' og lífið að komast í eðlilegt horf aftur, skólinn byrjar svo á morgun þannig að það er ekki seinna vænna að ná áttum aftur.

Bloggið í dag verður stutt, bara til að láta vita að ég var að bæta við fleiri barnahlekkjum, ég þekki svo mikið af barnafólki. Maður er víst kominn á þann aldurinn... ;o)

Jú, og eitt enn: ANDRI, TIL HAMINGJU MEÐ ÞRJÁTÍUÁRAAFMÆLIÐ!

ÚFF!!! og GLEÐILEGT ÁR!

Já, ÚFF!!!

Ég hef aldrei upplifað önnur eins stress og þreytujól! Síðasta prófið mitt var 20. des og þá átti ég mestallan jólasnúninginn eftir og fullt af vinnu en þetta hafðist. Svona að mestu leyti að minnsta kosti. Reyndar náði ég ekki að senda öll jólakortin sem ég ætlaði mér að skrifa og senda og vona að fólkið, sem ekki fékk kort en átti von á því eða vonaðist eftir því, fyrirgefi mér náðarsamlegast... En ég hafði það nú mjög gott fyrir jólin, þær stundir sem ég hafði fyrir sjálfa mig og mína, samt er ég einhvern veginn enn að bíða eftir jólafríinu mínu, finnst eins og það hafi ekki komið. Sem er náttúrulega nokkurn veginn satt því eftir að prófum var lokið þá tók bara vinnutörn við.

Anyway, ég er enn á lífi og skólinn byrjar von bráðar aftur og þá fer maður nú að vera reglulega í tölvusambandi og fer að blogga af krafti. Alla vega að blogga...

BÚIN!!!!!!!!!

Jess! Ég er búin í prófum og prófstressi þetta árið en við tekur ekki minna stress, nefnilega jólastressið! Ég á eftir að skrifa öll jólakort, kaupa allar jólagjafir (og ákveða flestar), baka, klára að flytja, skreyta (efast um að það verði gert) og vinna fullt! Og ég á ekki frí fyrr en 26. desember...

GLEÐILEG JÓL TIL YKKAR ALLRA OG HEYRUMST SÍÐAR!

...UPP TIL AÐ ANDA

jamm, er komin upp til að anda eftir einangrun og innilokun síðustu daga vegna ritgerðarskrifa og próflesturs. Reyndar bíður mín annað eins næstu daga þar sem að það er bæði próf og ritgerð á föstudaginn... En ég get alla vega leyft mér að anda aðeins í dag og skoða mannlífið utan fjögurra veggja heimilis míns!

I'M ALIVE!

SVONA Á FÓLK AÐ VERA!

Stundum er ég svo hissa hvað er til mikið af góðu fólki á Íslandi! Það er kannski ljótt að segja þetta en fólk á Íslandi er stundum soldið mikið upptekið af sjálfu sér. Nennir ekki að hleypa manni í bílaröðum ef maður á ekki réttinn og svoleiðis... En svo er til svona fólk eins og ókunna konan í Mosó sem sendi mér myndirnar um daginn.

Fyrir nokkrum vikum þá hitti ég aðra góða konu og mig langar að segja frá því líka. Þá var ég að versla fyrir vinnuna mína eins og svo oft áður, með algjörlega yfirhlaðna innkaupakerru. Þið, mínir dyggu og trúföstu lesendur, munið eftir konunni sem ég sagði frá um daginn, sem ranghvolfdi í sér augunum og varð bara þreytt á að horfa á mig en konan sem ég hitti á kassanum í þetta skiptið var ekki svoleiðis, ónei! Þessi var næst á eftir mér í röðinni með 'eðlilegt' magn af vörum og þegar búið var að skanna allar mínar vörur, þá var barasta heilt fjall á hinum endanum á 'afgreiðslukassaborðinu' (eða hvað maður kallar nú þessi færibandaborð) og ég stóð sveitt og pakkaði í kassa og poka eins og óð manneskja, til að vera sem minnst fyrir og í sem stystan tíma líka. Ókunna konan tók sig barasta til og hjálpaði mér að raða í pokana! Þetta hef ég aldrei upplifað áður. En svona á fólk að vera!

Takk fyrir það!

og eitt enn... ég stóðst ekki mátið og setti inn hlekk hérna til hliðar, inná síðu sem ég hef verið nokkuð dugleg að skoða í haust og hefur hjálpað mér mikið í heimaverkefnunum mínum. Kannski set ég inn fleiri hlekki síðar ef ég finn meira nammigott á veraldarvefnum...

flutt!

Jamm, ég er flutt. Ekki besta tímasetningin hjá mér en ég er víst ekki þekkt fyrir góðar tímasetningar á flutningum... Það er ágætt að vera komin á stað þar sem að maður hefur allt plássið útaf fyrir sig og getur verið eins súr á morgnana eins og maður vill án þess að eiga á hættu að sýra umhverfið í kringum sig...

Hitt er verra að það er enn ansi mikið af kassadóti hjá mér. Kassar sem þarf að henda, kassar sem þarf að taka uppúr, kassar með dóti sem þarf að fara í gegnum og henda eða setja niðrí geymslu. Ég hef þá allavega eitthvað að gera á milli jóla og nýárs!

Það sem böggar mig hins vegar mest er að ég er ekki enn búin að læra á nýja heimilið mitt eða að finna staði fyrir litlu hlutina mína eins og veskið, lyklana og budduna. Ég er nefnilega frekar (lesist: mjööög) vanaföst manneskja að eðlisfari þannig að litlu hlutirnir mínir eiga alltaf sinn stað hvert heima hjá mér. Eða kannski 2-3 staði hvert. Staði sem ég legg þessa hluti frá mér þegar ég kem heim og svo finn ég þá þar þegar ég fer út næst og þarf þá ekkert að hugsa um hvar hlutirnir séu. Nema svo ólíklega vildi til að ég hefði lagt hlutina frá mér á ókunnugan stað. Anyway, af því að buddan mín hefur ekki öðlast sinn fastastað ennþá, þá fór ég út án hennar í dag og sit núna peningalaus og svöng uppí skóla og er að læra (og blogga). Það besta við þetta er að ég veit sko alveg nákvæmlega hvar buddan er, í þessum skrifuðu orðum, en ég gleymdi bara að taka hana með mér í dag...

Og ég sem ætlaði að vera svo dugleg í pásunni minni og drífa mig í sund!

SMÁ ÓMAK OG STÓR GLEÐI

Þegar ég kom heim seint í gærkvöldi eftir mjög langan dag beið mín eftirfarandi bréf:

Blessuð Elísabet
Mér er sagt að þú hafir verið landvörður við Álftavatn í sumar. Ég tók þessar myndir í brjálaðri rigningu og þrumuveðri, foreldrar barnsins voru greinilega vinafólk þitt.
Getur þú komið þessu áleiðis, svona að gamni bara?
Kveðja,
Helga

Meðfylgjandi voru 2 myndir af Árna Gunnari “vinasyni” mínum í pollagalla að hoppa í pollum.

Mér finnst þetta alveg frábært framtak hjá ókunnugri konu og þakka henni kærlega fyrir, hvar sem hún er! Svona á fólk að vera!

Ása Lára, ég er á leiðinni til þín með myndirnar...

SMÁAUGLÝSINGAR DROTTNINGARINNAR...

Eins og sumir vita en aðrir ekki, þá er ég að fara að flytja! Tími til kominn að maður stingi endanlega af úr foreldrahúsum, langt komin á þrítugsaldurinn!!! Ég hef nú gert þetta nokkrum sinnum áður og á ýmislegt en alls ekki allt, hence the smáauglýsingar...

Ég auglýsi hér með eftir eftirfarandi hlutum, gefins eða fyrir slikk:
- eldhússtólar (2-4)
- skrifborðsstól
- sófaborð
- rúm
- þvottavél

Ef þið, kæru lesendur, eigið eitthvað af þessum hlutum en hafið samt ekki þörf fyrir þá, endilega hafið samband við mig... Netfangið er ellamaja@hotmail.com

DRAUMUR UM LANDROVER/NÁMU

Mig dreymdi draum í fyrrinótt um það að ég hefði keypt mér Landrover, skipt Rauðkunni minni út fyrir stóran, dökkan Landrover/Námu og var ægilega ánægð með það. Amk til að byrja með. Svo þegar ég vaknaði daginn eftir (í draumnum) þá fékk ég nú hálfgert sjokk yfir þessum bílaviðskiptum mínum og var með þvílíkar áhyggjur af greiðslubyrðinni og þess háttar og var eitthvað að vandræðast með það hvernig ég ætti að láta þessi viðskipti ganga tilbaka og fá Rauðkuna mína aftur.

Það besta var samt þegar ég vaknaði (í alvörunni) í gærmorgun, þá var ég ekkert viss hvort ég væri búin að kaupa mér Landrover/Námu eða ekki...

Reyndar fór ég í leiðinda-/letikasti á bílasölurúnt með bróður mínum um daginn. Ekki til að skoða 'Námur' heldur til að skoða súkkur. Það flottasta sem ég sá á þessum rúnti var samt silfurlitaður Twingo. Rosalega flottur! En ég er víst ekkert að fara að skipta um bíl...

PS. Best ég útskýri þetta með 'Námuna'. Þegar ég var lítil og átti heima í Þorlákshöfn, þá var pabbi minn að vinna í námu og keyrði um á Landrover. Hann kom stundum heim á daginn og sagði við mig:
"Viltu koma með útí námu?"
Ég vildi það auðvitað og fór með honum útí bíl og svo rúntuðum við útí námu og heim aftur. En fyrir mér var náman bíllinn en ekki náman. Nokkrum árum seinna, þegar ég var 6 eða 7 ára lenti ég í hörkurifrildi við besta vin minn um það hvort Landrover gæti líka heitað Náma eða ekki... Það er óþarft að taka það fram að mér fannst hann mjööög vitlaus að vita ekki að Landrover héti líka Náma!

AUGLÝST EFTIR FÉLAGSSKAP!

hæ, ég er að læra í bókhlöðunni og vantar svo afsökun til að stinga aðeins af og gera eitthvað annað. Er ekki einhver sem á leið hjá sem langar að fá sér kaffisopa með mér...?

ÍSLENSKUKENNARI Í BÓNUS

Ég gerði vikuinnkaup fyrir vinnuna mína í gær í Bónus í Smáranum. Þetta fellur af og til í minn hlut, ágætt að fá tækifæri til að breyta um umhverfi í vinnunni. Þessar innkaupaferðir minna mig alltaf svolítið á það þegar ég var að versla inn í ISO fyrir Sørensen-fjölskylduna á Exnersvej 36 um miðjan síðasta áratug. (Erna hefur rétt fyrir sér, það er bara nokkuð gaman að skrifa svona!)

Ég hef hitt ótrúlegasta fólk í þessum verslunarleiðangrum; gamla vinnufélaga, skólasystur úr gaggó og fleiri. Í gær hitti ég móðurbróður minn sem sagði mér að fara nú að kíkja í heimsókn og svo hitti ég gamla íslenskukennarann minn úr menntó. Hann kom mér algjörlega á óvart með því að þekkja mig með nafni því það eru liðin rúm 8 ár frá því að ég útskrifaðist sem stúdent! Ég flýtti mér náttúrulega að segja að ég væri svona nokkurn veginn að feta í fótspor hans, með íslenskunáminu. Hann bauð mér þá bara að koma og taka við kennslunni af sér þegar hann hættir. Ég afþakkaði pent og sagðist ekki hafa þolinmæði í kennslu...

Annars er gaman að hitta fólk sem maður hefur ekki séð lengi í þessum innkaupaleiðangrum. Sér í lagi rétt áður en maður fer á kassann því þá er maður búinn að yfirhlaða innkaupakerruna og er kannski með hátt í 20l af mjólk, 10l af súrmjólk/jógúrt, 4 stór brauð, 6-8 kg af kartöflum og grænmeti, kjöt, og álegg eftir því. Þá hef ég upplifað svona 'senaríó':

Það er litið á mig og heilsað, svo er litið á innkaupakerruna mína og á mig aftur, brosað vandræðalega og sagt:
“Komin með stóra fjölskyldu, ha?”

Best fannst mér nú konan (alveg ókunnug) sem var á undan mér á kassanum um daginn. Hún leit á mig vorkunnaraugum og sagði með uppgjafartón í röddinni:
“Þetta er nú ekki fyrir eina manneskju að gera öll þessi innkaup.”

Og hún hefur eflaust hugsað með sér að ég ætti nú ansi leiðinlegan mann og/eða fjölskyldu að nenna ekki með mér í búðina. Ég brosti bara og sagði að þetta væri fyrir vinnuna. Hún dæsti bara og sagði:
“Því síður fyrir eina manneskju.”

Ég held að hún hafi bara orðið þreytt á að fylgjast með mér.

TODMÓ/SINFÓ OG FYRSTA JÓLABOÐ ÁRSINS

Það var í dag hjá mér. Í vinnunni. Það er nefnilega venjan að bjóða fjölskyldum íbúanna okkar til smá jólaveislu og fólk hefur yfirleitt nóg að gera í desember þannig að við færðum þetta bara fram í nóvember. Þannig að ég var sem sagt að koma úr jólaboði þar sem á borðum var hangikjöt með öllu tilheyrandi og að sjálfsögðu maltesín. Smá forskot á jólastemmninguna.

Bara svo það sé á hreinu, þá mætti Todmó/Sinfó ekkert í veisluna heldur ætlaði ég bara að bæta örlitlu við tónleikaumfjöllunina mína hérna. Ég las nefnilega í Mogganum í gærkvöldi að tónleikarnir voru teknir upp og þessi sjónvarpsstöð ætlar að sýna þá á nýársdag. Þannig að þið sem misstuð af þessu læf eða í rúbartinu á föstudag, þið hafið sjens að ná þessu á nýársdag. Bara að fylgjast með sjónvarpsdagskránni...

TÓNLEIKARNIR

...voru alveg FRÁBÆRIR! Vei ykkur sem ekki höfðuð áhuga á að koma eða voruð í útlöndum/á leið til útlanda/úti á landi! Þið misstuð sko af miklu. Nema að þið hafið hlustað á beina útsendingu á Rás 2. Sem ég vissi reyndar ekki af fyrr en eftir tónleikana því annars hefði ég auglýst hana hérna.

Í dag er laugardagur og ég er að fara að læra. Gangi mér vel!

VINNUTÖRN LOKIÐ... Í BILI...

Jæja, þá er ég búin með vinnutörnina í bili. Þeas í gær var ég að vinna 9. vaktina á 11 dögum og það er soldið mikið þegar maður er bara með 60% starfshlutfall. Svo var mér boðið að taka aukavakt í dag en ég afþakkaði það. Ég hefði bara endað með því að standa á garginu því þolinmæði mín gagnvart skjólstæðingum mínum í vinnunni er komin í þrot. Ég þarf virkilega á þessum 4 frídögum að halda til að hlaða batteríin að nýju. Og læra. Og læra. Og læra.

Jamm, það er nebblega ný vinnutörn hafin á hinum vinnustaðnum mínum sem er eiginlega aðalvinnustaðurinn minn, hvort sem fólk trúir því eða ekki... Fram til 9. desember þarf ég nefnilega að skrifa 2 ritgerðir og læra fyrir 1 munnlegt próf og 1 skriflegt próf, þannig að ég hef nóg að gera. Núna er ég einmitt á leiðinni út í Hlöðu að læra.

Í kvöld ætla ég samt að skemmta mér, er að fara á þessa tónleika!

Ég er EFTIRLÝST...

tja, eða amk eftirsótt. Eða, ég var það alla vega eitt augnablik í morgun. Bankinn á Barónsstígnum hringdi nefnilega í mig og bað mig að koma og leggja inn. Ég varð við þeirri ósk og fór í hádeginu, beint eftir tíma.

Það er alltaf svolítil stemning yfir þessu og allir eru svo þakklátir. Svo fær maður fullt af veitingum; rúsínur og saltkex áður en blóðþrýstingurinn er mældur og hlaðborð þegar búið er að stinga mann og láta blóðið renna.

Í dag voru mér svo gefnar járntöflur og sagt að ég mætti ekki koma aftur fyrr en eftir fimm mánuði. Já, og ég fékk líka litla nælu sem er blóðdropi sem á stendur talan 5. Það stendur fyrir 5 blóðgjafir. Svaka huggulegt. Reyndar er ég búin að gefa blóð sex sinnum því ég gaf fyrst blóð í Danmörku, á Frederiksberg Hospital árið 1998. Þar var engin kaffistofa til að setjast inn á eftir blóðgjöfina, heldur var manni bara boðið uppá gosdrykk eða bjór eftirá. Danirnir alltaf samir við sig.

Athugasemdirnar komnar í lag. Án þess að ég hefði aðhafst nokkuð. Kannski voru þær bara ekki vaknaðar í morgun...?

Bumbólfur, MjúkiPúki eða... eða...

Mig langaði bara að láta ykkur vita að ég veit hvað Bumbólfur heitir en þar sem að ég veit ekki hversu opinbert það er orðið þá ætla ég ekkert að auglýsa það neitt nánar hér. Kannski að koma því á framfæri að ég notaði frekar kvikindislegt trikk til að fá nafnið. Það var einhvern veginn svona:

"Aron, hvað á litla barnið að heita?"

Og hann sagði mér það. HÚRRA fyrir eldri bræðrum!!!

Ég vil samt taka það fram að það var móðir bræðranna sem laumaði þessari hugmynd að mér...

og nú er ég fúl því kommentin mín eru horfin en ég hef ekki tíma til að rannsaka það nánar því ég er uppí hlöðu að læra. Á að flytja nokkur orð um Ólaf Þórðarson hvítaskáld á eftir. Fyrir þá sem ekki vita það, þá skrifaði hann Þriðju málfræðiritgerðina.

Þetta var fróðleiksmoli dagsins. Ef þið viljið fleiri fróðleiksmola, þá mæli ég með þessum fyrirlestri á morgun!

HELGIN

Helgin var fín. Föstudagurinn var rólegur enda ekki vanþörf á eftir mikla vinnutörn og verkefnaskil. Reyndar er vinnutörnin enn í gangi, 9 vaktir á 11 dögum... og ég sem þykist bara vera í 60% vinnu!

Á laugardaginn flæddi bjór og annað áfengi útum allt og yfir alla á Geysi og ég kom heim með tvær fjólubláar tær eftir góð tilþrif á dansgólfinu. Ég ætla aldrei aftur að dansa við Laugalandvörðinn því hann er með mjög harða fætur! Ég er ennþá ánægð með sjálfa mig fyrir að hafa sleppt því að fá mér gin&tónik... Bjórinn, kampavínið, whiskeyið, rauðvínið og koníakið var alveg nóg!

Það var gaman á laugardaginn en ekki eins gaman í gær. Vaknaði eins og mín er von og vísa eftir 5 klst svefn og var svona sæmilega hress en tókst þó að sofa aðeins lengur. Vaknaði aftur sæmilega hress en langaði sko ekki í neitt að borða. Þegar komið var í bæinn var heilsunni eitthvað farið að hraka enda sterk þörf á því að leggja sig aftur en það var ekki í boði því mín átti að mæta í vinnu kl. 15.
Það var ekki gaman.

Talaði aðeins við Bestaskinnið í gær. Hún var hress og var að tala um hvað það yrði nú gaman að fara að djamma og djúsa þegar leidíin lætur sjá sig á Fróni. Ég sagði bara:

“Nei, aldrei aftur fyllerí!”

En það er aldrei að vita nema maður skipti um skoðun á þessum vikum sem eru til jóla...

AFSLÁTTARKJÖR

Akkúrat núna er ég að bíða eftir því að risinn úr Hvanngili komi og sæki mig (á eðaljeppanum en ekki Fjallabakstuðrunni) því við, ásamt fleirum, erum á leiðinni í Fjallabaksteiti á Geysi!
Ég hlakka svo til!!! Það verður svo gaman!!! Hitta allt þetta hálfruglaða og kolruglaða lið aftur. Það verður spennandi að sjá hver fær heiðurinn af því að setjast í nuddsætið hjá Hvanngilsrisanum... Hann vildi amk aldrei nudda mig í sumar því ég var samstarfskona...

En að öðru, ég fór í vax á fimmtudaginn því mig langaði að vera dömuleg og fín með engin hár á leggjunum. Ég var nefnilega orðin alveg svakalega loðin (búin að safna samviskusamlega í 6 vikur!). Alveg sama hvað María vinkona segir, þá var ég orðin kafloðin og ódömuleg! Nema hvað, þegar vaxmeðferðinni er lokið segir skvísan:

"Heyrðu, ég get ekki verið að rukka þig fullt gjald því þetta er svo lítið. Ég gef þér smá afslátt!"

Ég var svo aldeilis hissa! Hef aldrei heyrt að maður fái afslátt af vaxi af því að maður er með svo lítið af hárum! Og ég sem hélt að ég væri svo svakalega loðin... María vinkona hefur þá kannski rétt fyrir sér þrátt fyrir allt!

Ég þakkaði bara pent fyrir mig og fór...

nútíð, FRAMTÍÐ og nánasta framtíð

Á sama tíma og það er frekar mikið að gera hjá mér, bæði vinna og skóli, get ég ekki hætt að spekúlera og velta mér upp úr alls konar ótímabærum hlutum, eins og t.d. hvað ég eigi að gera næsta vetur.

Ekki að það sé neitt vitlaust að velta framtíðinni fyrir sér en þar sem ég þarf m.a. að skrifa og skila BA-ritgerð í vor, sem er mun nær í tíma og rúmi, þá væri kannski gáfulegra að fara að negla niður um hvað ég ætla að skrifa og fara að eltast við heimildir... En ónei, mín er sko ekki mikið að huxa um það eins og stendur, heldur um hugsanlegt framhaldsnám og m.a.s. farin að bögga kennara og nemendur útum allan bæ með e-maili útaf því!

Ég ætti frekar að geyma þessar orkufreku pælingar þangað til í jólafríinu (lesist jóla"fríinu"), sér í lagi þar sem umsóknarfresturinn er til 15. febrúar.

já, nú er ég sko alveg að fara yfirum eftir eigið bloggfærsluleysi undanfarinna daga og get engan veginn hamið mig! Er samt að spá í að skokka niður á steríliseruðu kaffistofuna í Árnagarði og næra mig aðeins áður en ég fer að gera það sem ég kom til þess að gera. Nebblega LÆRA!

Danskir dagar

Hmmm... þetta er farið að líkjas aumingjabloggi. Hér hefur ekkert verið skrifað í rúma viku og fólk farið að tuða í mér. Ég óskaði ekki einu sinni afmælisbörnum síðustu viku til hamingju með daginn, ja fussumsvei! Hér kemur kveðjan þótt seint sé:

TIL HAMINGJU MEÐ AFMÆLIÐ, JÓHANNES, ÁSTA OG JÓEL!

Ætli það sé ekki best að bæta Lauren við þennan lista en mér var einmitt boðið í afmæli til hennar síðasta laugardag. 22ja ára. Hún er vinkona Davids og er frá Kanada eins og hann. Það rann upp fyrir mér þarna um kvöldið að ég var elst af öllum á staðnum, ekki það að ég fyndi fyrir því, mér fannst bara fyndið að átta mig á því. Ég upplifi mig alltaf sem rúmlega tvítuga en svo bregður mér þegar ég hitti fólk sem er rúmlega tvítugt því þá átta ég mig á því að ég er frekar tæplega þrítug en hitt...

Alla vega, hjá mér hefur lítið gerst undanfarið. Nema að það hefur verið einhver danskur andi yfir vötnum hjá mér. Talaði dönsku tvær helgar í röð! Ikke så slemt, hva?

Það kom soldið á óvart fyrri helgina því þá var ég í Thanksgiving-hittíngi með Kanadabúum á Íslandi (sat m.a.s. til borðs með sendiherranum) og þar var dönsk stelpa sem ég talaði aðeins við. Sú er að vinna fyrir danska gæjann með grænlensku sleðahundana fyrir austan.

Síðastliðinn laugardag fór ég svo á rúntinn austur á Þingvöll með Klöru vinkonu minni og Anne-Marie, danskri vinkonu hennar og sagði þeim með innlifun frá 'lovsigemanden', flekakenningunni og fleiru. Svo köstuðum við dönskum krónum með gati í Nikulásargjá.

Ekki nóg með að hafa hitt þessar dönsku skvísur heldur var ég eitthvað að gramsa í gömlum segulböndum (frábært orð!) í síðustu viku og dró fram eitthvað sem ég mundi ekki alveg hvað var. Stakk þessari snældu (annað frábært orð!) svo í fínu græjurnar í henni Rauðku minni og viti menn!

Fyrsta lagið sem ég heyrði var Han får for lidt með Østkysthøstlers. Hver kemst ekki í stuð með þessu?

Han spejler sig i spejlet for hans spejl er hans ven
Han kender hud og kinder ud og ind og ud igen
Han holder ormegården nede, sætter bumser under pres
med pincet er det nemt at holde brynene på plads
Skægget står totalt som var det målt med lineal
Han gør hvad han kan gøre for at ligne Georg Mikael
.
.
.
Han fatter ikke folk de ikke synes han er fed!

Han får for lidt,
det er derfor han er sådan
Alt for lidt kissemisse, alt for meget hånd

Mas. David sem skilur ekki orð í dönsku, sagði að þetta væri ekki svo slæmt!

Og eitt enn, kannski er það bara ég en ég hef tvisvar átt leið í nýju 10-11 búðina í Stóragarði og sú búð minnir mig bara á 7Eleven búðirnar í kóngsins Køben...